Ուղեղի համար օգտակար 6 համեղ մթերք. news.am

Ֆիզիկական կանոնավոր ծանրաբեռնվածությունը եւ ճիշտ սնվելը կարող են օգնել` տարիքին զուգահեռ, պահպանել հիշողությունը եւ մտավոր ֆունկցիաները: Առողջ սննդի ոլորտի փորձագետ Կասանդրա Բարնսը (Մեծ Բրիտանիա) նշում է 6 մթերքի մասին, որոնք օգտակար են ուղեղի համար:

Յուղոտ ձուկ

Յուղոտ ձուկը (օրինակ՝ սաղմոնը) Օմեգա-3 ճարպաթթուներ է պարունակում, որոնք հայտնի են որպես DHA: Այն մեծ քանակով պարունակվում է նաեւ ուղեղի գորշ նյութում: Գիտնականների կարծիքով՝ DHA-ի բավարար ծավալը նպաստում է հիշողության պահպանմանը, սովորելու գործընթացին եւ IQ-ի մակարդակի բարձրացմանը:

Հապալաս

Մեծաթիվ հետազոտություններով հաստատվել է, որ հապալասի օգտագործումը մեր ուղեղի համար օգտակար է հատկապես տարեց տարիքում: Հապալասը պոլիֆենոլներ է պարունակում, որոնք ուղեղը պաշտպանում են օքսիդատիվ սթրեսից եւ բորբոքումներից:

Սեւ շոկոլադ

Սեւ շոկոլադը ուղեղի համար հրաշալի մթերք է: Կակաոյի հում հատիկները հագեցած են ֆլավոնոլներով, որոնք հզոր հակաօքսիդանտ են եւ կարող են ուղեղը պաշտպանել նյարդադեգեներատիվ հիվանդություններից: Սակայն հարկ է նշել, որ խոսքը հենց կակաոյի մեծ պարունակությամբ սեւ շոկոլադի մասին է:

Դդմի կորիզներ

Դդմի կորիզները ցինկի աղբյուր են, որը չափազանց կարեւոր է ուղեղի մտավոր գործունեության համար՝ մտածելու, սովորելու եւ հիշողությունն ամրացնելու: Այս կորիզներում նաեւ մեծ քանակով մագնեզիում կա, ինչը նյարդային ազդակներին օգնում է ճանապարհորդել օրգանիզմում, այդ թվում նաեւ այն ազդակներին, որոնք ուղեղից են ստացվում եւ ուղեղ են գնում: Կորիզներում մեծ է նաեւ ճարպաթթուների եւ սպիտակուցների պարունակությունը: Սակայն չպետք է մոռանալ, որ դրանք նաեւ բավականին շատ կալորիաներ են պարունակում:

Ձու

Ձվի դեղնուցում շատ խոլին կա, որն անհրաժեշտ է նյարդերի միելինային թաղանթի նորմալ գործունեության համար: Ձուն նաեւ В վիտամինի եւ երկաթի աղբյուր է, որոնք անհրաժեշտ են նյարդային համակարգի եւ մտավոր ֆունկցիաների համար:

Ծովային ջրիմուռներ

Ճապոնական խոհանոցի առանցքային բաղադրամասը ծովային ջրիմուռներն են, որոնք գերօգտակար հանքանյութեր են պարունակում, այդ թվում՝ յոդ: Ինչպես մագնեզիումը, յոդը նույնպես կարեւոր դերակատարում ունի նյարդային համակարգի եւ ուղեղի առողջության համար, ինչպես նաեւ ցինկը՝ այն պահպանում է մտավոր ֆունկցիաները: Դրանից զատ, յոդն անհրաժեշտ է վահանաձեւ գեղձի նորմալ գործունեության համար: Բավականին դժվար է սննդամթերքից անհրաժեշտ քանակով յոդ ստանալ, բայց եթե սննդակարգի մեջ ներառվեն ծովային ջրիմուռները, այն կլրացնի օրական պահանջը:

Հարցեր, պատասխաններ, մեկնաբանություններ